«Интерфутбол» газетаси сайтига – interfutbol.uz хакерлар томонидан ҳужум уюштирилди. Ҳужум Clone-Security хакерлик гуруҳи томонидан амалга оширилган. Буни у Твиттердаги саҳифасида тасдиқлаган. Бироқ мақсад ҳамон номаълум.

Хакерлар сайтга аллақандай ёлғон маълумотни жойлаган. Эмишки, «Барселона» – «Пахтакор» футбол жамоалари ўртасида учрашув ўтказилган ва ўйин 895:1 ҳисобида пахтакорчиларнинг мағлубияти билан якунланган. Мағлбиятдан юзи шувут бўлган Миржалол Қосимов «Барселона»га мураббийликка ўтган. Сайтда, шунингдек, «Насаф» клуби футболчиларининг ўқув-йиғин машғулотларини ўтказиш мақсадида Тошкент – Марс ҳаво йўналиши орқали Марсга жўнаб кетгани ҳақида масхараомуз хабар жойлаштирилган.

Таъкидлаш жоиз, кейинги вақтларда Ўзбекистон сайтларига хакерлик хужуми бир мунча авж олмоқда. Айнан ана шундай хужумлар оқибатида дастлаб uff.uz (Ўзбекистонда футбол хабарлари), кейинчалик uzembassy.az (Ўзбекистоннинг Озарбойжондаги элчихонаси), mtrk.uz (Ўзбекистон миллий телерадиокомпанияси) каби сайтларга шикаст етказилган.